फोहोर गरेको भन्दै १ लाख जरिवाना

काठमाडौं ।    काठमाडौं महानगरपालिकाले सार्वजनिक स्थानहरुमा फोहोर तथा भौतिक क्षति पुर्‍याएको भन्दै राष्ट्रिय प्रजातन्त्र पार्टी (राप्रपा) लाई एक लाख रुपैयाँ जरिवाना गरेको छ। काठमाडौं महानगरकाले आइतबार पत्रचार गर्दै राप्रपाले जथाभावी फोहोर फालेर वातावरण प्रदूषण समेत गरेको महानगरको दाबी छ। राप्रपाले आफ्नो पार्टी कार्यालय धुम्बाराहीबाट आयोजना गरेको कार्यक्रममा सहभागीहरूले त्रिभुवन अन्तर्राष्ट्रिय विमानस्थल, तिलगंगा, गौशाला लगायतका सार्वजनिक स्थानका सडक, सडकपेटी, आईल्याण्ड, तथा त्यहाँ रहेका बिरुवा र रेलिङमा क्षति पुर्‍याएका थिए।

महानगरको फोहोरमैला व्यवस्थापन ऐन, २०६८, काठमाडौं महानगरपालिका वातावरण तथा प्राकृतिक स्रोत संरक्षण ऐन, २०७७, तथा आर्थिक ऐन, २०८१ को आधारमा कारबाही गरिएको पत्रमा उल्लेख छ ।